நவராத்திரி கவிதைகள் - லலிதையின் பெருமை

பரி முகன் தமிழ் முனிக்கு அருள் செய்த
கரி முகன் கார்த்திகேயன் தாயின் பெருமை
அரி முகன் அச்சுதன் தமக்கை லலிதையின்
ஒரு ஆயிரம் நாமத்தின் மஹிமை என்சொல்வேன்!

சரி என்று கும்பமுனி தான் கேட்டு உலகுய்ய
எரி முகன் தீவண்ணன் நாயகி தனிப்பெருமை
உரி வெண்ணை பால் தன்னை களவால் தானுண்ட
அரி முகன் தங்கை பெருமை தன்னை சொல்லும் பனுவல் !
என் சொல்வேனோ!

ஒரு ஆயிரம் நாமத்தில் அடங்கும்   அனைத்துமே!
அறம் பொருள் இன்பம் வீடு தந்திடும் அவள் நாமங்கள்!
விரும்பிய பொருட்கள் அனைத்தும் தந்திடுமே!
அரும்பு முல்லை பல்லாளின் வடிவழகை மறவாதவர்
கரும்பு வில்லை கைக்கொண்ட நாயகி தாள் அடைவர்!
நன்மை எல்லாம் பெறுவர்!

பிறப்பறுக்கும் பிணிகளை நீக்கிடும்
இறப்பருக்கும் இனிமை பயந்திடும்
கருப்புவில்லும் பூச்செண்டும் கைக்கொண்ட
நெருப்புவண்ணன் நாயகியாள் நாமம்
கருப்புநிறத்தோன் தமக்கை கன்னிகை
சிறப்பு நல்கும் அவள் திருப்பாதங்கள்!